ఓ మిస్సమ్మా.......! (మహానటి సావిత్రిగారి జన్మదిన సందర్భంగా)

  ఓ మిస్సమ్మా!

  అందమనే పదం నీకోసమే పుట్టిందేమో!

 నీవు నవ్వితే నవరత్నాలు నిస్సందేహంగా రాలునేమో!

 నటనకు నడకలు నేర్పినది నీవేనేమో!

  ఓ సావిత్రీ!

 ఎక్కడని వెతకము నీకోసం

 కానీ ఎక్కడా కనిపించవేం?

 ‘దేవదాసు’లో చూశాము, పార్వతియే కనిపించింది

 ‘కన్యాశుల్కం’ లోనూ , మధురవాణియే కవ్వించింది

 ‘మిస్సమ్మ’లో వెతికితే, మేరియే తారసపడింది

 చివరికి,

 ‘మాయాబజార్’లోనూ గాలించాము, అక్కడా శశిరేఖయే  ఎదురుపడింది 

 ఎక్కడెక్కడ వెతికినా సావిత్రి మాత్రం అగుపించలేదు

 నీవు చేసిన పాత్రలే పలకరించాయి 

 ఓ రాధా!

 ‘సుందరీ!, నీవంటి దివ్యస్వరూపంబు ఎందెందు వెతికినా లేదు కదా!’

 ‘నీవేనా నా మదిలో నిలచి, హృదయము కలవరపరచినది’

 ‘నా హృదయంలో నిదురించే చెలీ!’

ఇలా ఎన్నెన్నో రాగాలు, సరాగాలు నీ గురించి.

 ఓ మధురవాణీ!

 యుగాలు గడచినా, తరాలు మారినా

అందం, అభినయం కలబోసిన దేవత ఎవరంటే

మేము నీ పేరే చెబుతాం

ఎందుకంటే ,

ఓ మిస్సమ్మా!, మేము నీ అభిమానులం.

నీకు మేము మనస్ఫూర్తిగా జన్మదిన శుభాకాంక్షలు తెలుపుకుంటున్నాము.